Gal 4 | APZ | STEP | Oso pahnnɨmo hungkuno sɨmo'mo seloheso apa'no waselɨmonne'no yohono. Hwe fihwo poyo pe'nɨngkahonɨngki kakoe ho'yango hamniyoho yo'mayoso kakoe hwomu we'e sohumne'no a'amu nom'ne sohwa hwomu we'e sohwo'nji ho'yango so'nji umokosyohumahonɨngkofi hwomu we'e sohwo kako syoho ulohofiyo pa'nyo hweho.

Galatians 4

1 Oso pahnnɨmo hungkuno sɨmo'mo seloheso apa'no waselɨmonne'no yohono. Hwe fihwo poyo pe'nɨngkahonɨngki kakoe ho'yango hamniyoho yo'mayoso kakoe hwomu we'e sohumne'no a'amu nom'ne sohwa hwomu we'e sohwo'nji ho'yango so'nji umokosyohumahonɨngkofi hwomu we'e sohwo kako syoho ulohofiyo pa'nyo hweho. 2 Hwapɨngoso we'e sohwo kako a'amu kakimo umokosyohumayo somo enjwa'mnoho. Kakoe ho'yango yo'mayo somo uhwontohumayo hwafoho. I tɨfi no'mo hwomu huhwo sohwo oso sɨkuno kanɨngkwohwo ho'nahumentiso somo kakoe ho'yango yo'mayoso mokosyohumantɨhwone hweho. 3 Oso pa'nyo nakwo humamentɨhwonefoho. Jisas mape sohonta nakwo mehomi pa'nyo humentani nakwo honɨngkano hungkuno somo enjwa'mo humentani honɨngkano hungkuno hiso mekilo'mokonehumajɨ'mentisofoho. 4 Oso sɨkuno Anɨtu kako ho'nahumentiso somo kakoe Hwomu nakwoe hwahopo uhwatɨmentisofoho. Kona'wohi Jisasɨmo aswo mahonɨngki kako honɨngkano hungkuno somo enjwa'mo humamentisofoho. 5 Anɨtu kakoe hwomu uhwojahonɨngki kakoe hwomuso nakwo honɨngkano hungkuno somo enjwa'mo humalohwone hn'nyumo isɨhuto nalohofonto Anɨtuye mehomi ne namokumentisofoho.

6 Nakwo kakoe mehomi ne imo'nyo so'no netɨhwayo'neso Anɨtu kakoe hwomufe Towahuno nejopahonɨngki Towahuno sohwo ehuhnnaofonto Anɨtumo ulɨwo'nɨngki, Mpohwo, Mpohwo. 7 Oso'no nakwo nom'ne somo enjwa'mo mohumulohwono. O'o, kakoe mehomi'nwoho. Oseso nakwo kakoe mehomi hn'nyumo yo'mayo Anɨtu kakoe mehomimne'no ito'no esyohumamentisoso wonejapmmontonoho.

Poul kako a'amu Ngkolesiya somne'no huno pi'nɨngo syafɨhu'mentisofoho.

8 Sekwo temtitofo kengo soku, hohonta sekwo Anɨtu ne sohumo huno maseimentiso sohonta sekwo hwahoponjo anɨtu hwasyo sofe syoho ulohofimentohofofoho. 9 I olohonta sekwo Anɨtu ne sohumo tɨpemalokwofo. I nom'ne hungkuno ole, Olohonta Anɨtu kako sekumo tɨpesemalofoho. Oso'no sekwo honɨngkano hungkuno somo enjwa'mo wohumantɨfe'no liyalokwofo. Oso honɨngkano hungkunoso yokumpohn'nyo ane hweho. 10 Sekwo ole lalokwofo, Nakwo yo'mayo sɨkuno fisomo u yo'mayo hamno fisomo soswo fisomo tɨmo uhwonɨwo'nɨngkuhwone so'no Anɨtu kako wopɨngo kuyoho wonalono. Ose lalokwofo. Oso hunoso omomo hunofoho. 11 Oso'no ngko sekumne'no huno pi'nɨngo engo syofɨsyalokweno. Anɨtuye hungkuno losetɨhwamentohe so'no ngko syoho siki syoho kiyalokweno. Ne'maso imo'nonetɨkeno.

12 Nje a'amu soku, nje hungkuno somo haloho popmno. Ngko honɨngkano hungkunomo enjwa'mo mohumunyo hwo'nyoho. Oso pa'nyoso sekwo hmmo'nɨmno. Sekwo hohonta a'amu Jutafe honɨngkano hungkuno somo enjwa'mo mohumammotofo kuyoho. Oso pa'nyoso ngko humaleno. Ngko sekwo'nji nohumentanɨngko sekwo ngkimo wonyohofiyo ntoho'mentohofofoho. 13 Honɨngkanopo hano loho'nawenji nom'ne angopono wamonji ko imentoheso mnokino engo tɨpemanji sekuyepono asomo ponji Anɨtuye hungkuno losetɨhwamentohefoho. Sekwo inɨngo laseyohoho. 14 Oso mnokinoso sekumo tango engo ko se'mahonɨngki sekwo ngkine'no hohujo mikinjanɨmofe'njo imentohofofoho. O'o, sekwo hofiyo ntoho'mentohofofoho. A'amu ahwomomjo sohwanji Jisas Kɨlais sekumo se'mahonɨngkofi sekwo wopɨngo umokosyohumamentohofo pa'nyoso ngkimo nɨmokosyohumamentohofofoho. 15 Osohonta sekwo ngkine'no sɨmonyo imentohofofoho. I olohonta sekwo honɨngkano nom'ne kengo so'no syafɨsyontɨfi sɨmeho wopɨngo lasemo'nɨngkohoho. Hohonta oso mnokino nimentiso sohonta sekwo sɨmeho engo ntapmmentohofo so'no nɨfo'mayo'ne sekwoe ho'yango yo'mayo hopi'nono nontapɨkutnnesohilo. Ngko huno ole nɨyohoho, Sekwo ngkimo nɨfo'mayo'manji ole wontantɨfeho. Nakwoe tɨmo wokitɨhwofiyano. Wonyoangkafo nɨmokosyohumamentohofofoho. 16 I olohonta sekwoe yahino kengo so'no hungkuno nehopi selahonɨngko ngkine'no nakwoe mango hweho lohnnalokwofo.

17 A'amu hwasyo hungkuno'njo sohwa hofɨko sekumo afofo semokalokwofo. I hwapɨngoso sekwo hofɨkoe yofe ho'nomayo'nefoho. Hofɨko sekumo ajwo'mo mase'mofontɨfi ngkimo mempo hohnta'ni womenɨhumojantɨfe'no yalokwofo. 18 A'amu nom'ne somo afofo hungkuno ne'njo umokiyoso wonyo'maho. O'o, honɨngkano wopɨngomo mjɨmɨweneso afofo umokiyoso wonyoangkafofoho. Ngko anepo, ou sekwo'nji nohumentanɨ'mo hofɨko sekumo afofo semokiyoso wopɨngofoho. 19 U nje mehomi, sɨmeho sejopalokwe soku, sekwo tohino engo ntopalokwofo. A'musi kakoe mehomi aswo mayo'ne tohino engo umnɨwo'nɨngkiso pa'nyoso ngko sekumne'no apa'no nɨmnalofoho. Oso tohino mjanɨmnɨmɨhwosi sekwo sekwoe sɨmeho sekwoe huno sekwoe a'apaho hopi'nonohinoso Jisas Kɨlaisɨmo nɨhu'nahone uyɨkuji kako sekumo sehula'afonefoho. 20 Ngko sekwo'nji wohumamonne'no yalokweno. I ngko sekwo'nji humayo'manji hungkuno olo pa'nyo maselɨmnehono. I ngko ikanopo humale so'no pipi imnehono. Sekwoe omomo yahino so'no huno pi'nɨngo engo syofɨsyalokweno.

Apɨlohamɨye ape Hekalɨ'nji Sola'njiye pahnnɨmo hungkuno Poul mtɨ'mokumentisofoho.

21 Sekwo njimno. Sekwo Mousesɨye honɨngkano hungkunomo enjwa'mo wohumantɨfe'no yalokwofo soku, oso honɨngkano hungkuno neso sekwo huno laseyohoho. 22 Hungkuno hiloso ole naliso, Apɨloham hwomu hufa'u tɨpema'mentisofoho. Tisɨmaso sohwo Solafe syoho ulohofiyosi aswo ma'mentisofoho. Apɨlohamɨye ape nesi aswo nom'nehwo ma'mentisofoho. Kakoe yofe Aisakɨyoho. 23 Syoho ulohofiyosi Hekal kako mehomi aswo mayoso a'amu mawo'nɨngkohofo pa'nyofoho. I Apɨlohamɨye ape ne Sola hwonjo ape nɨhu'no a'manesi Anɨtu hungkuno Apɨloham ya'umo ulɨmentiso so'no Sola mehomi ma'mentisofoho. 24 Olo a'mu sofa'umne'no pahnnɨmo hungkuno waselɨmonne'no yohono. Ape sofahusi siko Anɨtuye hungkuno hufa'u pa'nyo fa'uyoho. Sɨmo'mjosi Hekal kako hwofɨki'nyo Sainai pa'nyiyoho. Osopo Anɨtu kako Mousesɨmo honɨngkano hungkuno uyɨmentisofoho. Hekalɨye mehomiso syoho ulohofiyo a'amufoho. 25 Hwofɨki'nyo Sainai sopo hwaho Alepiya wo'nnyoponoho. Pone engo Jelusalem hwofɨki'nyo Sainai pa'nyofoho. Oso ango pone Jelusalem olo hwahoponjo a'amu osopo humalofoso hofɨko honɨngkano hungkuno somo inɨngkawowo'nɨngkohofo so'no honɨngkano hungkuno hiso hofɨkimo mekilo'mokohumatn'nyofoho. Oso'no hofɨko oso hungkuno somo syoho ulohofiyo hwafoho. Hekalɨye mehomi pa'nyofoho. 26 I Anɨtuye hungkuno nom'neso Apɨlohamɨye ape nesi pa'nyofoho. Sola kako syoho ulohofi'maho. O'o, ape nefoho. Kako Anɨtuye ahwomomjo ango nemokosyohumayo pa'nyiyoho. Ango Jelusalem songoponoho. A'amu hn'nɨmo momekilo'mokonehumajiyo'neponoho. Sola kako nakwoe nena'wohiyoho. 27 Aisaiya oso ango pone Jelusalem hufa'uyo so'no Anɨtuye hungkunomo ole mtɨ'mokumentisofoho. Ole nalɨmento,

Kɨko ape hwonjo siki, sɨmonyo fiyo.
Kɨko mehomi aswo momaso'njo ko yonji kɨko mango engo'nji isamoyoka njo.
Hwapɨngoso mehomi pi'nɨngo engo wosejapmmonnoho.
Jɨje mehomiso ape syoho ulohofiyo siye mehomimo uyakolopitnnefoho.
Aisaiya ose mtɨ'mokumentisofoho.

28 Nje a'amu soku, sekwo Solafe hwomu Aisak pa'nyo kuyoho. Anɨtu sɨmo'mo Apɨlohammo hungkuno uyonto tɨfi no'mo kakoe hungkuno ne imo'nyo'ne Solamo hwomu uyɨmentisofoho. 29 Hohosohonta syoho ulohofiyo siye hwomu sohwo ape ne siye hwomumo tango uyɨmentisofoho. Oso pa'nyo olohonta Anɨtuye Towahuno nakumo Anɨtuye a'amu ne nemokahonɨngki nakwo tango malokuhwono. A'amu honɨngkano hungkunomo enjwa'mo humalofoso oso tango hiso nejopalokwofo. 30 I oso'no a'amu Anɨtuye hungkuno mtɨ'mokumentohofoso ole mtɨ'mokumentohofi Anɨtu Apɨlohammo ulɨmento,

Syoho kilohofiyo si'nji kakoe hwomu'nji wae fiyo.
Syoho kilohofiyo siye hwomu sohwo kako jɨje hwaho yo'mayo ho'yangoso momanehoho.
O'o, jɨje ape ne siye hwomu ne sohwo kako'nohini nomane hweho.
31 Oso'no nje a'amu soku, nakwo syoho ulohofiyo siye mehomi'maho. Nakwo honɨngkano hungkunomo enjwa'mo mohumayo'nwoho. Honɨngkano hungkunoso nakumo momekilo'mokonehumajonehoho. O'o, nakwo ape ne siye mehomi'nwoho.